ТРОПАРЬ, ГЛАС 3
Це́ркве Ру́сския сто́лпе непоколеби́мый, / благоче́стия пра́вило, / жития́ ева́нгельского о́бразе, / священному́чениче Се́ргие, / Христа́ ра́ди пострада́вый да́же до кро́ве, / Его́же моли́ усе́рдно, / я́ко Нача́льника и Соверши́теля спасе́ния, / Русь Святу́ю утверди́ти в Правосла́вии // до сконча́ния ве́ка.
КОНДАК, ГЛАС 2
Восхва́лим ве́рнии, / изря́днаго во свяще́нницех / и сла́внаго в му́ченицех Се́ргие, / Правосла́вия побо́рника и благоче́стия ревни́теля, / земли́ Ру́сския кра́сное прозябе́ние, / и́же страда́нием Небе́с дости́же / и та́мо те́пле мо́лит Христа́ Бо́га // спасти́ся душа́м на́шым.
МОЛИТВА
О избра́нниче и уго́дниче Христо́в, священному́чениче Се́ргие, Це́ркве Ру́сския сто́лпе непоколеби́мый, земли́ на́шея благо́е прозябе́ние и кра́сный плод, сро́дников твои́х предста́телю и наста́вниче! Ты во вре́мя гоне́ния безбо́жнаго от сокро́вищницы души́ твоея́ спаси́тельное испове́дание Правосла́вныя ве́ры изне́сл еси́, и лю́дем ве́рным па́стырь до́брый яви́лся еси́, ду́шу твою́ за Христа́ и Его́ о́вцы полага́я и лю́тыя во́лки дале́че отгоня́я. Ны́не у́бо при́зри на нас, недосто́йных чад твои́х, умиле́нною душе́ю и сокруше́нным се́рдцем тя призыва́ющих. Умоли́ Го́спода Бо́га, да прости́т согреше́ния на́ша и изба́вит от а́довых уз и ве́чнаго муче́ния. Утверди́ нас в ве́ре святе́й, научи́ нас всегда́ твори́ти во́лю Бо́жию и храни́ти за́поведи церко́вныя. Бу́ди па́стырем на́шым — пра́вило ве́ры, во́ином — вождь духо́вный, боля́щим — врач изря́дный, печа́льным — уте́шитель, гони́мым — засту́пник, ю́ным — наста́вник, всем же благосе́рдый оте́ц и те́плый моли́твенник. Я́ко да моли́твами твои́ми соблюде́ся в Правосла́вии Свята́я Русь и непреста́нно сла́вится в ней и́мя Пресвяты́я Тро́ицы, Отца́, и Сы́на, и Свята́го Ду́ха, во ве́ки веко́в. Ами́нь.
Молитва, приведенная ниже, впервые была прочитана за Архиерейским богослужением 12 марта 2022 г. в Скорбященском женском монастыре. Текст составлен по благословению Преосвященного Феодосия, епископа Нижнетагильского и Невьянского. 12 марта 2023 г. хор церковно-певческих курсов Нижнетагильской епархии исполнил составленные в обители тропарь и кондак священномученику Сергию.
ТРОПАРЬ, ГЛАС 4
Благочести́вых отце́в насле́дниче,/ па́стырю до́брый ста́да Христо́ва,/ сладкоглаго́ливый пропове́дниче И́стинных Боже́ственных слове́с,/ ве́ры правосла́вныя защи́тителю и раско́ла обличи́телю,/ дарова́ньми мно́гими Це́ркви послужи́л еси́,/ в у́зах си́лу ду́ха яви́л еси́,/ возсия́л еси́ но́вый свети́льник вселе́нней,/ в терпе́нии сораспена́яся Христу́,/ воспева́ем твоя́ страда́ния,/ засту́пниче Нижнетаги́льския зе́мли,/ Русь Святу́ю в Правосла́вии утверди́// до сконча́ния ве́ка.
КОНДАК, ГЛАС 4
Чи́стое благоуха́ние Го́сподеви,/ священному́чениче Се́ргие,/ писа́ньми мно́гими Сло́во Бо́жие изъясня́л еси́/ и все́м ве́рным пу́ть спасе́ния указа́л еси́,/ моли́ Всеблага́го Небе́снаго Царя́,/ да сохрани́т Це́рковь и зе́млю Ру́сскую/ от ересе́й, раско́лов, мяте́жа и бра́ни,/ укрепи́т нас в единомы́слии по́двигом твои́м,/ ниспо́слет нам ми́лости Своя́,// и спасе́т ду́ши на́ша.
ВЕЛИЧАНИЕ
Велича́ем тя,/ священному́чениче Се́ргие,/ и чти́м честна́я страда́ния твоя́,/ я́же за Христа́/ во утвержде́ние на Руси́ Правосла́вия// претерпе́л еси́.
МОЛИТВА
О Боголюбе́зне па́стырю Се́ргие, сла́вный в му́ченицех! О́гненное восхожде́ние твое́ лицезря́ще во оби́тели го́рния, недоуме́ем, ка́ко благохвали́ти тя́, па́че же ти возсле́довати, ди́вный, любвеоби́льный о́тче. Ве́мы бо тя́ па́стыря предо́бра гра́да Ни́жний Таги́л и Ура́льския земли́, му́жеством изря́дна и во духо́вных бра́нех неодоли́ма. Ве́мы тя возлю́бленнаго Ца́рскаго до́ма побо́рника, страны́ правосла́вной укрепи́теля, раско́ла Це́ркви обличи́теля и разделе́ний, раздо́ров го́рьких врачева́теля. Ве́мы тя и наста́вника бу́дущия па́стырей и воспита́теля сла́вного дще́рей ю́ных, бу́дущих же́н до́брых и матере́й, наипа́че же земны́х учителе́й, усе́рднаго просвети́теля наро́да Бо́жия в ве́ре правосла́вныя. Ве́мы тя храни́теля церко́вных дре́вностей, тру́женика на ни́ве доброде́лания во сла́ву Бо́га на́шего и умягче́ния злы́х серде́ц. Ты́ и слове́сным да́ром Це́ркви послужи́л еси́ и му́зыки тала́нт Го́сподеви прине́сл еси́. Па́че же, па́стырю бла́гий, а́ще и презре́л еси́ суету́ ми́ра сего́, оба́че вся тяготы́ и ско́рби ча́д духо́вных вмеща́л еси́ в се́рдце свое́. Па́ки и в боле́знех сме́ртных, и в заточе́ниих о́браз смире́ния кра́йняго ди́вно яви́л еси́, па́стырю Бо́жий. Над си́м же все́м солнцесия́ет му́ченический ти вене́ц.
Сего́ ра́ди в па́мяти твое́й единя́емся и усе́рдно про́сим: Ны́не у́бо покры́й нас те́плым твои́м предста́тельством, при́зри на ны, недосто́йных ча́д твои́х, умиле́нною душе́ю и сокруше́нным се́рдцем тя призыва́ющих. Утверди́ ны в ве́ре святе́й, помози́ ны в борьбе́ с ереся́ми и наше́ствием иноплеме́нных, соблазня́ющих нас к ве́ре чужде́й. Привлещи́ до́брые семена́ и возрасти́ плоды́ в де́лех воспита́ния и просвеще́ния ча́д. Научи́ ны, ле́ностныя, всегда́ твори́ти во́лю Бо́жию и храни́ти за́поведи церко́вныя, е́же го́рняя нам му́дрствовати, грехо́вных же отступа́ти и су́етных. Се бо́ и разже́но сло́во твое́ зело́ и дерзнове́ние преве́лие, е́же стяжа́л еси́ пред престо́лом Бо́жиим, научи́ ны горя́чей и чи́стей моли́тве, помози́ возлюби́ть е. Освяти́ зе́млю нижнетаги́льскую, что́бы житие́ на не́й бы́ло свя́то и безпоро́чно и просла́вились в ней ини́и подви́жницы Божии. Бу́ди па́стырем на́шим пра́вило ве́ры, во́ином во́ждь духо́вный, неду́жным вра́ч изря́дный, печа́льным уте́шитель, гони́мым засту́пник, ю́ным наста́вник, все́м же благосе́рдый оте́ц и те́плый моли́твенник, я́ко да моли́твами твои́ми соблюде́тся в Правосла́вии Оте́чество на́ше и гра́д тво́й, и непреста́нно сла́вится в них и́мя Пресвяты́я Тро́ицы, Отца́ и Сы́на и Свята́го Ду́ха во ве́ки веко́в. Ами́нь.
12 марта 2024 г. за богослужением в день памяти священномученика Сергия Увицкого исполнялись другие тропарь, кондак и молитва.
ТРОПАРЬ, ГЛАС 4
Нивы церковныя благодатный клас / плод сторичный яве приносит: / скорбию прозябая, возрастает терпением, / орошаем свыше богомыслием, / корение семьи благочестием утверждает, / воспитуя глаголом духовным верныя, / возвышает надеждею небесных / вся претерпевает злострадания/ сладкословесный Сергий, свидетель Истины // молитвенник о душах наших.
КОНДАК, ГЛАС 4
Уральских гор пресветлую звезду, / поборника веры отеческия, / хранителя благочестия семьи, / просвещения народа ревнителя, / пастыря изрядна и многострадальна, / верна Господеви исповедника и славна мученика, // Сергия прелюбезна восхвалим вси.
МОЛИТВА
О славне священномучениче Сергие, отче наш богоданный и богопрославленный! К тебе припадаем, обремененнии грехми, к тебе взываем, скорбьми отягченнии. Воздохни о нас пред Спасом Христом, да не прогневается на нас, нерадивых и ленивых, прослези и пред Пречистою Материю Его, да пробавит милость Свою на нас и вседержавным покровом Своим да защитит ны от враг видимых и невидимых. Вемы тя, отче святый, яко добраго воистину пастыря, вемы и учителя терпения крайняго, вемы тя и мученика доблественнаго. Сего ради, подвигом жития твоего озареннии, души наша предаем молитвенному заступлению твоему, ныне и присно и во веки веков. Аминь.
